أكد الرئيس عبد الفتاح السيسي، خلال افتتاح مجمع الوثائق المؤمنة والذكية بالعاصمة الإدارية اليوم الأربعاء، أن المجمع يمثل نقلة كبيرة للحكومة الذكية، كاشفًا أنه تم التفكير فيه للمرة الأولى عام 2015، ولم يكن واضحًا للجميع الهدف منه، مشيرًا إلى أنه تكلف حوالي مليار دولار، وأن الشهادات الصادرة عنه مؤمنه بنسبة 99.9%.
وقال السيسي، إن هناك تعديا على أراضي الدولة وأراضي الأوقاف نظرا لسهولة تزوير تلك المستندات.
وأكد ضرورة مواجهة الفساد والاختراق، مشيرا إلى أنه شاهد أوراقا باسم جهات حكومية وسيادية في الدولة مزورة لتسهيل أمور غير مشروعة.
وشدد السيسي، على أن رقمنة الدولة المصرية وحوكمة الإجراءات تسهم في الحد من الفساد، موضحا أن هذا المشروع يقترب تكلفته من مليار دولار.

وفيما يلي نص كلمة الرئيس السيسي خلال الافتتاح:
كل عام وانتم طيبين بمناسبة قرب حلول شهر رمضان، وإن شاء الله يبقى علينا كلنا بخير وصحة وسلامة وتوفيق.
واسمحوا لي أن أبدأ كلامي، أحنا شوفنا نموذج من 3 وزارات بتقدم اللي ممكن حتى الآن يتم التعامل بيه من خلال هذا المجمع، وأنا عايز أقولكم إن احنا لما فكرنا في المجمع دة في 2015 يعني مكانش أبدًا واضح لكثير من اللي أحنا بنتكلم معاهم فيه الهدف منه.. يا ترى يعني أية الكلام دة… وكنا دائمًا بنقول ان هذا المجمع هيعمل معانا نقلة كبيرة أوي خاصة لو وضعناه مع فكرة الحكومة الذكية يا دكتور مصطفى اللي أحنا رايحين لها في العاصمة.
أحنا كنا بنتكلم كتير وبنقول أن أحنا عايزين نطور بلدنا، وعايزين نتأكد ان أحنا ماشيين بشكل جيد وبنتكلم في الفساد ونتصور أن الفساد إرادة سياسية فقط، لا، مش إرادة العاملين في الدولة عن هما يحققوا كدة لازم نستفيد من العلوم ومن التكنولوجيا الموجودة والمتاحة في العالم عشان تساعدنا أن كل المستهدفات وكل الأهداف اللي أحطنا حطيناها ممكن تتحقق، وإلا يبقي أحنا ضيعنا وقت كتير أوي وبنضيع جهد كبير أوي ومبنحققش اللي أحنا عايزينه.
وخليني أقولكوا الدكتور معيط يمكن أتكلم عن الفلوس بس مش هو دة بس اللي مطلوب لكن هو حب يقول إيه من خلال اللي أنا هعمله دا أنا هقدر أعظم الموارد بتاعة الدولة، ودة بصراحة امر إيجابي، لأن كل ما هنجيب… بردو دة فساد ان حد يتهرب من التزاماته المالية الدستورية طبقًا للقانون اللي بتحددها الدولة ويتهرب منها دة امر مش جيد وفيه فساد أيضًا.. بس أنا حبيت أقول إيه أن مش القضية فقط لوزارة المالية أن هو يعني يجابه التهرب الضريبي أو ياخد مستحقاته.. لا.. أحنا عايزين نثق في أنفسنا.. أنا أتصور أن مجمع الوثائق المؤمنة هيضيف لبنة جيدة في أن أحنا نبقي واثقين في أنفسنا.. لما نيجي نقول الشهادة دي محدش بقى يتحسب ويقول دي ممكن تكون مزورة.. لا مش هيبقي كدو.. ما دام طلعت من المركز هنا خلاص بنسبة 99.9% طيب أنا سايب 1% ليه لأن بردو يعني مش عايز أقول المستحيل يعني مستحيل أن يتعمل دة.. لأن بنقول قد يكون مستحيل.
وبالتالي لما نيجي نقول النهاردة الشهادات اللي موجودة مع الطلبة بتاعتنا في مراحل التعليم المختلفة زي ما اتقال أو في الجامعات ورسائل الدكتوراه زي بيتقال خلاص كل واحد معاه وثيقة يصعب أو يستحيل أن هي تبقي مزورة أنا بقول دة مع الجهد اللي الدولة بتعمله في الحكومة الذكية اللي هيكون في العاصمة الجديدة، حطوا الاتنين مع بعض شوفوا النتيجة بتاعة الدولة المصرية هتبقي عاملة ازاي عند ان أحنا نمارس هذا العمل بالطريقة دي… فالفكرة كلها كمان بالإضافة لكدة ان مش بس منع الفساد لا حوكمة إجراءاتنا.. يعني النهاردة هديكوا مثال… كان فيه تعدي كتير على أراضي الدولة وأراضي الأوقاف.. ليه.. لأن الوثائق اللي موجودة اللي خاصة بيهم ممكن تزور.. ولا أية يا دكتور مصطفى… ففي ناس معندهاش كدة وتقدم حاجة وتاخد بيها حاجة مش بتاعتها… وأنا عشان كدة بقول للدول من فضلكم أراضي الدولة يا دكتور مصطفى دلوقتي وأراضي الأوقاف تطلع وثائق بيها بالكلام دة.. الوثائق دي يعني يكون بس الأمور تتدققت بشدة ونطلع بيبقي عندنا مستندات دي ملكية الدولة… الأرض اللي أنا بتكلم عليها الـ 100 ألف فدان دول.. دول يتوع الدولة ميروحوش لحد تاني إلا بقرار ينقل دة وتتعمل إجراءات النقل بتاعته بورق مؤمن بردو عشان ميبقاش فيه فرصة لحد انو يخش ويتعدى على أراضي الدولة مثلا وياخدها.
فاللي أنا عايزة أقوله إذا كنا بنتكلم قبل كدة في أن أحنا عايزين نجابه الفساد ونجابه التجاوز اللي ممكن يحصل، ونجابه أيضًا عملية الاختراق… هو انا في الجمارك هدفي فقط في إجراءاتنا في أننا اتحصل على الأموال ولا أيضًا أمنع دخول مواد خطرة على الأمن أو محظور أنها تخش… الورق فيه فرصة للتجاوز وأنا شوفت حاجات كتير جدًا خلال يعني مش دلوقتي بس حتى قبل ما ابقي في مكاني دة وشوفت اد أية ممكن يتعمل ورق باسم جهات حكومية أو جهات سيادية في الدولة عشان يتسهل بيها دخول أمور في منتهي منتهي الخطورة على الأمن وعلى الصحة العامة يمكن، وبالتالي لما أحنا ينعمل الإجراءات متكاملة مع بعضها البعض وزي ما انتوا شوفتوا اللي طرح دة عبارة عن جزء من الأفكار اللي تم التعامل معاها دلوقتي.. بعد كدة لو قولنا إن كل وزارة كنا عايزنلها يومين كل وزارة تقوم تقولنا إية الإجراءات اللي هتعملها لصالح الوزارة الخاصة بيها للاستفادة من هذا المجال… بالمناسبة المكان دة قد يقترب ثمنه من مليار دولار.. قد يقترب ثمنه من مليار دولار.. بأرضه بحاله بمحتاله.. عشان أية… دة مبلغ كبير أوي أن أحنا نصرفه… طيب فب حد من المنطقة.. أه فيه عناصر من المشروع دة ممكن تبقي موجودة في دول لكن التكامل دة أتصور ان هو موجود عند دول قليلة جدًا يتعدوا على صوابع الأيد الواحدة او الأيدين في العالم كله.
أحنا ينتكلم على دولة جديدة انا قولتلكوا الكلام دة قبل كدة، والكلام أنا بقوله مش… أنا لو عايز افتتح كل يوم مشروع كل يوم بس خايف عليكوا… والله خايف عليكوا… لو كل يوم في مشاريع تتفتتح كل يوم من دة اتعملت أزاي اتعملت بجهدكوا وبفكركوا وبأرادتكوا وبأموالكوا.. عايز كل يوم مشروع بمستوى أه موجود.. فكل شوية نطلع مشروعين تلاتة كدة عشان بس أية نطمن نفسنا ونطمنكوا ان احنا ماشين على الطريق الصحيح.
أنا بس أتصور ان أحنا يمكن محتاجين نفكر كويس أوي في التشريعات التي تجرم التجاوز في المسار ده مثال يعني الدكتور طارق بيتكلم عن الكتاب المدرسي وبيقول أن الكتاب المدرسي هيبقى بعد كده طالع من المطبعة بتاعت الحكومة اللى هيعطي للطلبة عليه الباركود ده وبالتالي الـ 200 مليون كتاب بقوا مين الى مطلعهم احنا، طب حد طالع عامل حاجة تانية ومطلعها، وعرضها، طب المكتبة اللى هتعرض كده نتكلم معاه ازاي، طب اللى باع الكلام ده نتعامل معاه ازاي، فلازم مع التطور ده يبقى فيه تطور في التشريع اللى احنا هنشغلنا وانا يعني ده كلام موضوع فني وقانوني وقضائي وده اللى احنا نفكر فيه إزاي كل الكلام اللى احنا بنقول عليه ده نأمنه، بتشريعات تجرم أي تجاوز فيه او أي محاولة لاختراقه عشان نبقى احنا عملنا الموضوع بشكل متكامل.
انا عايز اقولكم ان اللى احنا يعني انا مش هقدر أتكلم على كل ما يمكن ان يقدم في هذا المشروع للدولة المصرية، أولا لأن انا معرفش كل حاجة، ثانيا لأن في كلام ما يتقالش، ماينفعش يتقال. بقولكم تاني عن النهاردة الدكتور اللى اتقال كلام مهم ان الدكتور طارق وانا هتوقف قدامه، البيانات، البيانات والمعلومات كنز يا جماعة. كنز وهقول تعبير صعب، وعورة، انا هحط على كارت الطالب كل البيانات؟ وتبقى متاحة؟ ويبقى بيانات الطلبة كلها يعني عايزية ننتبه قوي قوي ان احنا واحنا بنتيح البييانات دي، أن المركز هنا عنده القدرة دي، والنظام اللى احنا عاملينه بتاع قواعد البيانات يا دكتور مصطفى، معمول في الحكومة أن كل واحد يطلع على الجزء الخاص به، يعني وانا رايح النهاردة التأمين الصحي مثلا ومعايا الكارت او البطاقة الخاصة بيه ادخل على المستشفى هاخد فيها خدمة تشوف التاريخ الطبي بتاعي، لكن ما تشوفش بقية حاجاتي، ماتشوفش أي حاجة تانية. كل جهة معنية بالبيانات هتشوف البيانات الخاصة بيها. لكن البيانات العامة دي مش هبتقى متاحة ان انا أي حد يشوف كل حاجة، ماينفعش.
ارجع تاني وأقول نخلي بالنا واحنا بنتكلم على القدرة التكنولوجية لازم باردوا يبقى عندنا تقدير وتقييم لمخاطر القدرة التكنولوجية، ليها مميزات ولازم باردوا نبقى متحسبين ان يكون ليها أي شكل من اشكال الضرر. ارجع تاني وأقول ان احنا محتاجين ان احنا ننسق كتير جدا من بياناتنا خاصة الحكومة. يعني ارجع أقول ايه، هاتولى حصر بالاراضي والمنشآت الخاصة بالدولة، ومدى توثيقها. توثيقها يعني يبقى ليها وثيقة كده. صدقوني كتير من الكلام ده مش موجود اللى بيعرف الحكاية بقى يعرف أن المكان ده يبقى فيه كلام من ده. يدخل ويشكل مركز قانوني، ضدي، ضدي يعني او ضد الدولة، ويدخل بالمحكمة وانا هحترم حكم المحكمة. فإحنا محتاجين واحنا بنعمل كده، نحيي كل البيانات وكل الوثائق وكل التسجيل، ويتم التسجيل دلوقتي وفي خلال مثلا ست شهور او سنة نكون خلصنا هذا الموضوع بحيث إن احنا في نهياته بنقول لدينا مش قواعد بيانات، لأ لدينا عقود مؤمنة وموثقة لكل ما لدى الدولة حتى الأراضي الكبيرة يعني الدولة كلها المليون كيلو متر دول يبقى ليهم شهادة وليهم وثائق وكلام من هذا القبيل والاستفادة من اللى ااحنا موجودين بيه.
دي بس مقدمة خاصة بمركز الوثائق المؤمنة ومش هنسي ان انا أوجه الشكر لكل العاملين وكل اللى اجتهدوا خلال الخمس سنين اللى فاتوا عشان يخرج هذا المجمع بالشكل ده وهقول تاني لهم وللى موجودين من فضلكم لا تنسوا ان التطوير عملية ما بتتوقفش، مش عايزين واحنا موجودين في هذا المجمع نقول ايه، لدينا احدث تكنولوجيا ولدينا احدث قدرة، خلاص، لأ احنا دائما عندنا ناس، والناس الى تم اختيارهم هنا، ناس من أفضل شباب مصر لا كان في مجاملة ولا كان في محاباة ده درجات علمية محترمة واختبارات وكده. احنا عايزين نستمر في الموضوع اللى عملية التطوير بحيث ان احنا ما نتوقفش ويبقى دايما الجديد هيتعرض علينا ونشوف هنعمل ايه. ارجو من القائمين على هذا العمل، من فضلك اهتم بالصحة العامة للقائمين في المجمع، اهتم بالصحة العامة للقائمين على هذا العمل. الصور من بعضها واضح إن في بعض العاملين في وزن زيادة، وانا ارجو ان محدش يتألم من كلامي، لأ الدول المتقدمة بتعمل المدير الكبير اللى موجود بيعمل برامج عشان يحافظ على كفاءة موظفيه او العاملين عنده وده حقهم انما مش يشتغل بس. ده يشتغل واخلى بالى منه واشوف صحته ويبقى ليه لقاءات معاه، يعني ده موضوع مش هتكلم فيه كتير وما اقصدش بالكلمة الى قلتها دي أي حاجة. لأ ده انا وانا بتكلم في بداية الموضوع في مثلا نشاط رياضي الصبح وفي مراجعة طبية للصحة لأن الناس دي عقول نيرة وتدريبها تدريب كبير واحنا مش بنخاف عليها عشان هي كده بس شكلها مش جميل، يعني انا خايف عليهم بس عشان، لا والله انا خايف عليهم وخايف على كل مصري، بس يا ترى احنا ننتبه للنقطة دي.
احنا امبارح كنا بنفتتح مش بنفتتح احنا كنا امبارح بنحضر حاد جزء من المحاصيل المزروعة في أحد المشروعات القومية وانا لما بكرر الموضوع ده ولما بكرر موضوعات اخرى الهدف منها إني أسجل للحكومة وأسجل لكل من يقوم بجهد كبير ي بناء الدولة وفي بناء قدرتها لأ. بناء الدولة وبناء قدرتها التقدير والشكر على اللى بيعملوه وبقولهم يلا ونستمر وبالمناسبة كل ما تلاقوا تحدي قدام منكم قلقكم ما يتحولش لخوف او تردد او كمون. لأ كل ما بيبقى في تحدي كل ما يبقى في عمل، عمل وإرادة من حديد لأن احنا نتجاوز ظروفنا، ونأكد ان احنا دولة احنا كنا عاملين الاحتفال بتاع المومياوات دول لحكام لمصر من 3500 ولا من 4000 سنة، كانوا قادة وكانوا وطنيين ورسموا وكتبوا في التاريخ على مدى اربع الاف سنة حبهم لبلدهم. واحنا باردوا لما عملنا النقطة دي كنا عاييزين نقول خلي بالكم، الدولة دي دولة من زمان قوي ، من زمان قوي من أيام ماكانت المية بتنزل محدش كان بيمنعها ولا حد كان بيوديها، هي بتنزل كده ربنا خلى المية تروح هناك وتجيلنا هنا .وقامت الحضارة دي والحضارة دي هتستمر.

Scroll Up